1.

Fara inn í Reykjavíkur Apótek og biðja um venjulega herraklippingu. Leggja áherslu á að hún eigi bara að vera venjuleg ef bið verður á þjónustu.

2.

Fara inn í Aðalpósthúsið í Reykjavík og biðja um tveggja manna herbergi með baði. Taka fram að það þurfi hins vegar ekki að vera með síma.

Vera undrandi að ekki skuli vera bað á herbergjunum ef afgreiðslustúlkan segist ekki hafa nein herbergi.

3.

Ganga inn um aðaldyr Alþingis og biðja þingvörð mjög kurteislega að fá að tala við Lilla klifurmús.

Ef þingvörðurinn kannast ekki við neinn með því nafni á að spyrja hann hvort hann sé nýbyrjaður.

4.

Fara inn á Hótel Borg og fá sér sæti í veitingasalnum.

Biðja um réttlæti þegar þjónninn kemur.

Ef þjónninn segist ekki vera með neitt þess háttar á að benda á myndina af Jóhannesi Jósefssyni og skora á þjóninn að taka glímu.

Þegar lögreglan kemur á að veifa Ljóð námu völd eftir Sigurð Pálsson til sönnunar því að allt sé þetta samkvæmt bókinni.