Vertu öllum gegn og góður,

gleddu bæði föður og móður;

þyki þér lífsins þungur róður,

þegar á þig hallar,

þolinmæðin þrautir vinnur allar.

Sitji einhver hugar hljóður,

huggaðu þá, sem líða.

Hjartans kulda barnabrosin þíða.

Viljirðu sigra og verða mestur,

vinnst ei neinn á stríði frestur.

Þig ef stundum þrekið brestur,

þá er að vaka og biðja;

bænin er hin besta sálar iðja.

Sannleikurinn er sagna bestur,

svo að þér megi treysta.

Glæddu þennan guðdómlega neista.

‍

gegn: traustur, mætur, nýtur 

lífsins róður: lífsbaráttan (lífi mannsins er hér líkt við sjóferð: róður á úfnum sjó)

það hallar á einhvern: einhver er hlunnfarinn, hann fer halloka  

hugar hljóður: með hljóðum hug, dapur    

líða: þjást 

þíða: bræða, taka frostið úr 

vinnst ei neinn á stríði frestur: verður að hefja stíðið (baráttuna) tafarlaust 

þig brestur (þrek): þig vantar, skortir (þrek)

iðja: (hér) starf