Afríkuríkið Úganda var nýlenda Breta frá 1894 til 1962 þegar ríkið varð sjálfstætt lýðveldi.  Í fyrstu kosningunum þar í landi varð Milton Obote forsætisráðherra og síðar einnig forseti frá 1966.

Tuttugasta og fimmta janúar árið 1971 gerði hershöfðinginn Idi Amin uppreisn og tók völdin í sínar hendur. Hófst þá ógnarstjórn í landinu sem stóð yfir til ársins 1979 þegar Amin var hrakinn frá völdum og Obote komst til valda á ný.

Amin var sannkallaður harðstjóri. Hann lét taka fjölda manns af lífi og hrakti tugi þúsunda úr landi.

Í október árið 1978 réðst hann inn í nágrannaríkið Tansaníu en mætti öflugri mótspyrnu tansaníska hersins sem var dyggilega studdur af hermönnum frá Úganda sem flúið höfðu ógnarstjórnina heimafyrir. Á endanum sneri her Tansaníu vörn í sókn og réðst inn í Úganda með þeim afleiðingum að Idi Amin lagði á flótta og lést í útlegð árið 2003.