Í október árið 1913 var orðið jazz (jass) notað í fyrsta sinn á prenti svo vitað sé. Það var í blaðinu San  Francisco Bulletin. 

Jass er tónlistarstefna sem átti uppruna sinn í New Orleans í Bandaríkjunum á síðari hluta 19. aldar og byrjun þeirrar tuttugustu og sótti rætur sínar til ragtime tónlistar og blústónlistar. Varð tónlistarstefnan gríðarlega vinsæl á stuttum tíma og breiddist út um allan heim.  Þá þróaðist hún á marga vegu. Af kunnu hljómlistarfólki sem tileinkaði sér þessa stefnu má nefna Louis Armstrong, Billie Holiday, Bix Beiderbecke, Ellu Fitzgerald og Sidney Bechet svo einhverjir séu nefndir.   

Í dægurtónlist var Irving Berlin mjög vinsæll lagahöfundur á þessum tíma en hann samdi t.a.m. lög eins og What´ll I Do?, Puttin´on the Ritz, Blue Skies, White Christmas og fleiri kunna smelli. 

Í klassískri tónlist samdi Erik Satie verkið Descriptions automatiques fyrir píanó, Sergei Rachmaninoff samdi píanósónötu númer 2 og Claude Debussy verkið Syrinx fyrir flautu.