Kaflar
1903: Fyrsta Tour de France hjólreiðakeppnin
Fyrsta Tour de France hjólreiðakeppnin fór fram í júlí árið 1903. Var það blaðið L´Auto sem stóð fyrir henni. Keppnin stóð frá fyrsta til nítjánda júlí og voru hjólaðir 2428 kílómetrar í sex áföngum.
Blaðið L´Auto stofnaði til keppninnar til að auglýsa sig en salan á blöðum þess hafði dregist saman með tilkomu annars blaðs, Le Vélo.
Keppnin var sú fyrsta sinnar tegundar þar sem hjólað var í áföngum. Eins og áður sagði voru áfangarnir eða leiðirnar sex talsins en hver leið mun lengri en þær eru í dag.
Sigurvegari þessarar fyrstu keppni var Maurice Garin ítalsk-franskur sótari (hreinsari skorsteina).
Garin tók forystuna á fyrstu leiðinni og hélt henni út alla keppnina þó hann næði ekki að sigra á leið tvö, þrjú og fjögur. Þegar upp var staðið var hann þremur ˙klukkutímum á undan næsta keppanda.
Keppnin skilaði stofnendum hennar árangri því útbreiðsla L´Auto sexfaldaðist í kjölfarið. Þess vegna var ákveðið að halda hana aftur ári síðar. Því má bæta við að blaðið Le Vélo var farið á hausinn áður en næsta keppni hófst.