Paavo Johannes Nurmi (1897-1973) var á sínum tíma besti hlaupari í heimi í milli- og lengri vegalengdum. Var hann gjarnan kallaður Finninn fljúgandi. Samtals náði hann tuttugu og tveimur heimsmetum á sinni tíð og vann níu gullverðlaun og þrenn silfurverðlaun í þeim tólf hlaupum sem hann tók þátt í á ólympíuleikunum. Þegar hann var á hátindi síns ferils vann hann eitthundrað tuttuguogeitt hlaup í röð, og á sínum fjórtán ára ferli tapaði hann aldrei víðavangshlaupi eða tíu þúsund metra hlaupi. 

Nurmi var af verkafólki kominn og hætti í skóla 12 ára gamall til að leggja sitt af mörkum til að framfleyta fjölskyldunni. Þegar hann var fimmtán ára fór hann fyrst að æfa markvisst. 

Á ólympíuleikunum árið 1920 byrjaði hann á því að vinna silfurverðlaun í 5000 metra hlaupi og vann svo gull í 10000 metrunum og víðavangshlaupum. Árið 1923 var hann heimsmethafi í míluhlaupi, 5000 metra hlaupi og 10000 metra hlaupi en það hefur enginn leikið eftir honum. 

Þá sigraði hann á ólympíuleikunum árið 1924 með nýjum heimsmetum í 1500 metra hlaupi og 5000 metra hlaupi og það sem meira er þá leið aðeins ein klukkustund milli hlaupanna.