Versalasamningurinn var friðarsamningur Bandamanna og Þjóðverja við lok fyrri heimsstyrjaldar og má segja að með honum hafi verið bundinn endi á ófriðinn milli Þjóðverja og Bandamanna. Hann var undirritaður 28. júní 1919. Stríðsátökunum sjálfum lauk 11. nóvember 1918 þannig að það tók rúmlega sex mánuði að gera samninginn.

Samningurinn kvað á um að Þjóðverjar bæru ábyrgð á styrjöldinni og að þeim bæri að greiða háar stríðsskaðabætur til Bandamanna. Þá skyldu þeir láta lönd af hendi til Frakklands, Póllands, Tékkóslóvakíu, Danmerkur og Belgíu. Enn fremur var öllum nýlendum Þjóðverja skipt upp milli annarra nýlenduvelda og þeir máttu einungis hafa 100.000 manna herlið. Þeim var einnig bannað að hafa flugher, og skipaflotinn var tekinn af þeim. Samningurinn var einkar óvinsæll í Þýskalandi, enda voru skaðabæturnar svo háar að fólk þar leið skort. Þessi samningur er talinn ein helsta ástæðan fyrir því að nasistar náðu völdum í Þýskalandi 1933. Utan Þýskalands voru einnig margir á þeirri skoðun að samningurinn væri ósanngjarn.