Árið 1972 voru ólympíuleikar haldnir í Þýskalandi í fyrsta sinn síðan 1936 þegar nasistar réðu þar ríkjum. Voru leikarnir kynntir sem gleðileikarnir en annað átti þó eftir að verða raunin.

Leikarnir voru settir 26. ágúst við mikinn fögnuð en 5. september réðust átta menn inn í búðir Ísraela, skutu tvo til bana og handtóku 9 aðra. Tilheyrðu þessir menn palestínska hryðjuverkahópnum Svarta september. Kröfðust þeir að 235 palestínskir fangar í haldi Ísraela yrðu látnir lausir.

Var reynt að semja en Ísraelar þverneituðu að verða við kröfum um frelsun fanganna.

Á endanum var ákveðið að leiða hryðjuverkamennina í gildru með því að bjóða þeim leið til að komast burt. Það gekk ekki eftir og í kjölfarið drápu þeir alla gíslana. Af þeim sjálfum létust fimm en þrír voru handteknir.

Á þessum ólympíuleikum setti bandaríski sundkappinn Mark Spitz heimsmet er hann vann þar til sjö gullverðlauna. Þar sem Spitz var af gyðingaættum var hann beðinn um að vera ekki í lokahófi leikanna því óttast var um velferð hans eftir það sem á undan var gengið.