1979: Pol Pot og Rauðu kmerarnir missa völdin í Kambódíu

Kambódía hafði verið nýlenda Frakka frá því skömmu eftir aldamótin 1900. Í síðari heimsstyrjöldinni var landið hernumið af Japönum. Eftir síðari heimsstyrjöldina vildu Frakkar taka völd þar aftur en íbúarnir voru ekki á því. Spruttu upp mikil átök sem enduðu með því að Kambódía varð sjálfstætt ríki árið 1953.

Helsti ráðamaður í Kambódíu á árunum frá árinu 1954 fram til ársins 1970 var Sihanouk prins. Þá var gerð hallarbylting í Kambódíu þegar prinsinn var í opinberri heimsókn í Kína. Var þessi nýja stjórn studd dyggilega af Bandaríkjamönnum, en þeir áttu þá í stríði í nágrannaríkinu Víetnam.

Í kjölfarið má segja að borgarastyrjöld hafi ríkt í landinu þangað til kommúnistinn Pol Pot og Rauðu kmerarnir brutust til valda árið 1975. Rauðu kmerarnir voru kommúnísk skæruliðasamtök sem barist höfðu gegn frönsku nýlendustjórninni í Kambódíu.

Við tók sannkölluð ógnarstjórn. Íbúarnir voru látnir vinna sem þrælar, enginn mátti eiga neitt og öllum skólum var lokað. Tugir þúsunda voru drepnir. Þá var það árið 1979 að Víetnamar réðust inn í landið og frelsuðu þegnana og komu á nýrri stjórn.

Gagnvirk æfing (fjölvalsspurningar)

Ert þú tilbúin(n)?

Spurningar

1. Hverra nýlenda var Kambódía?

2. Hverjir hernámu Kambódíu í seinni heimsstyrjöldinni?

3. Hvenær varð Kambódía sjálfstætt ríki?

4. Hver var helsti ráðamaður í Kambódíu frá því um 1954 til 1970?

5. Hverjir brutust til valda í Kambódíu 1975?

6. Hvernig var stjórn Pol Pots og Rauðu Kmeranna í Kambódíu?