6. Gunnlaugur heimsækir jarla og konunga

Gunnlaugur hafði heitið því að yrkja um þrjá konunga og tvo jarla. Og þegar hann kom til til Lundúnaborgar gekk hann fljótlega fyrir Aðalráð konung og flutti kvæði og fékk að launum skarlatsskikkju. Konungur gerði hann að hirðmanni sínum.

Einn morgun mætti Gunnlaugur þremur mönnum á stræti. Forsprakkanum Þórormi tókst að fá unga Íslendinginn til að lána sér fé. Konungur frétti þetta og leist ekki á, enda væri Þórormur ræningi og þrjótur. Nokkru síðar hitti Gunnlaugur Þórorm og krafði hann um féð, en hann neitaði að borga. Gunnlaugur skoraði þá Þórorm á hólm. Konungi stóð ekki á sama því að hann vissi að Þórormur deyfði hvert vopn.

Og nú gefur konungur Gunnlaugi töfrasverð sem hann skuli nota í einvíginu en segir honum að sýna Þórormi annað sverð við upphaf einvígis og blekkja hann þannig. Bragðið heppnaðist og Gunnlaugur gat notað konungsgjöfina án þess að Þórormur vissi. Hann felldi Þórorm og varð frægur fyrir þetta afrek.

Um vorið fór Gunnlaugur til konungsins á Írlandi og jarlsins í Orkneyjum og orti lof um þá báða og þáði af þeim góðar gjafir. Hann siglir um haustið til Noregs en fer þaðan rakleiðis til Gautlands því að í Noregi mátti hann ekki vera vegna reiði Eiríks jarls. Í Gautlandi ríkti jarlinn Sigurður, og Gunnlaugur orti lofkvæði til hans. Um jólin komu sendimenn Eiríks jarls í Noregi til Sigurðar jarls í Gautlandi. Gautar héldu því fram að enginn jarl væri meiri og frægari en Sigurður. En Norðmönnum þótti Eiríkur jarl miklu fremri. Gunnlaugur var fenginn til að dæma í málinu. Hann orti vísu og hrósaði Eiríki jarli meira en Sigurði. Eiríkur Noregsjarl frétti af úrskurði Gunnlaugs og það varð til þess að hann lét þau boð út ganga að Gunnlaugur skyldi eiga friðland í ríki hans.

Gunnlaugur orti um þjóðhöfðingja á Bretlandseyjum. Í sögunni segir: „Ein var þá tunga á Englandi sem í Noregi og í Danmörku.“ En það er reyndar hæpið að engil-saxnesk tunga hafi verið nógu lík norrænu máli til að menn gætu gert sig skiljanlega hvorir við aðra. Hitt er annað að norrænir menn höfðu á þessum tíma lagt undir sig stór svæði á Bretlandseyjum, og norræn tunga var því töluð á ýmsum stöðum þar, t.d. í Orkneyjum._
Aðalráður ráðlausi_: Englandskonungur (979 –1016)
skarlatsskikkja: skikkja úr vönduðu lituðu ullarefni
deyfa vopn: gera vopnin bitlaus
Gautland: landsvæði sem nú er hluti af Svíþjóð (sbr. Gautaborg á vesturstönd Svíþjóðar)
Svíþjóð: á dögum Gunnlaugs náði Svíþjóð yfir mun minna svæði en nú. Svíþjóð var austan við Gautland og náði að Eystrasalti. Uppsalir voru þekktasta borgin í Svíþjóð. En Danir réðu Skáni (sem núna er syðsti hluti Svíþjóðar)

Gagnvirk æfing (fjölvalsspurningar)

Ert þú tilbúin(n)?

Spurningar

1. Í Gunnlaugs sögu er á einum stað minnst á það tungumál sem talað var á Englandi á dögum Gunnlaugs. Hvað vekur athygli í því sambandi?
2. Hverju hafði Gunnlaugur heitið áður en hann kom til Lundúna?
3. Aðalráður gaf Gunnlaugi mjúka gjöf sem síðar kemur við sögu. Hvaða gjöf var það?
4. Þórormur var fjölkunnugur og í sögunni segir að hann hafi getað „deyft hvert vopn“ (þ.e. gert hvert vopn bitlaust) með því einu að horfa á það. Þetta vissi Aðalráður konungur og því greip hann til ákveðinna ráðstafana þegar hann frétti að Gunnlaugur hefði skorað Þórorm á hólm. Hvaða ráðstafana?
5. Hvað varð til þess að Eiríkur jarl í Noregi tók Gunnlaug í sátt?
6. Hvaða landi tilheyra Gautland og Skánn nú?
7. Hvað heita eyjarnar sem liggja örskammt norður af nyrsta hluta Skotlands (Katanesi)?