Kaflar
2. Þróun mannsandans 1
Í alfræðiritinu Britannicu er þróun manna rakin út frá nokkrum lykiluppgötvunum sem segja má að hafi haft umtalsverðar breytingar í för með sér fyrir mannkynið. Rétt er að taka það fram að þó svo að þetta séu þær uppgötvanir sem þeir hjá alfræðiritinu telji að mestum breytingum hafi valdið er sjálfsagt að hafa aðra skoðun á því.
Fyrstu tólin fyrir um tveimur milljónum ára
Verkfæri og einföld tól voru komin í notkun að talið er fyrir um tveimur milljónum ára. Þau tól voru fyrst og fremst steinar með hvössum brúnum sem notaðir voru svipað og hnífar, steinar sem hægt var að nota eins og hamar og einnig stórir steinar sem nýttust sem steðjar. Leifar af slíkum verkfærum hafa fundist í Kenía. Eru þessar uppfinningar eignaðar tegundinni Homo habilis (hinum handlagna manni).
Eldurinn uppgötvaður fyrir rúmlega milljón árum
Hvenær menn tóku eldinn í þjónustu sína er ekki vitað með vissu. Talið er að tegundin Homo erectus (hinn upprétti maður) hafi verið fyrstur til að nota eld. Leifar af eldi hafa fundist í hellum sem tilheyrðu þeim. Hinn upprétti maður kom fram á sjónarsviðið fyrir 1,6 milljónum ára.
Landbúnaðarbyltingin fyrir 15.000-20.000 árum
Fyrir um 15.000-20.000 árum byrjuðu menn að rækta skipulega jurtir til matar sem hafði þá einnig í för með sér að fólk settist að í stærri hópum á ákveðnum stað enda þurfti að hlúa stöðugt að ræktuninni. Á svipuðum tíma er farið að notast við áhöld úr leir, skálar, diska og könnur auk múrsteina í byggingar. Hjólið mun hafa verið fundið upp á þessum tíma. Þá hafa fundist leifar af groddalegum vefnaði sem rekja má til sama tímabils.
6000 f.Kr.: Áveitur
Fyrstu merki um það þegar menn fara að útbúa áveitur, þ.e. að grafa skurði til að veita vatni. Áveiturnar koma fram í kringum 6000 f.Kr. Þessi þekking virðist koma fram á tveimur stöðum á sama tíma, þ.e. í Mesópótamíu annars vegar og Egyptalandi hins vegar. Í Mesópótamíu voru árnar Tígris og Efrat notaðar en í Egyptlandi áin Níl.
Það að grafa slíka skurði krefst mikils mannafla og skipulags sem sýnir að þjóðirnar sem stóðu að því voru mjög skipulagðar.
4000 f.Kr.: Siglingar
Fyrstu stóru bátarnir sem vitað er um munu hafa siglt á Nílarfljóti í kringum árið 4000 f.Kr. Þar notuðust menn við bæði segl og árar.
2000 f.Kr.: Brons
Hin svokallaða bronsöld stóð frá því um 2000 f.Kr. og fram til þess tíma að menn hófu að vinna járn. Brons fékkst með því að bræða saman tin og kopar. Það var notað í vopn, verkfæri og ílát.