Kaflar
5. Egyptaland hið forna
Hið forna ríki Egypta er eitt elsta samfélag sem við þekkjum. Það byggðist í kringum ána Níl í Norður Afríku og stóð yfir í um 2500 ár.
Stjórnendur ríkisins kölluðust faraóar sem merkir húsið mikla og réðu þeir öllu. Hélst það embætti í ættum þó svo að stundum hafi ný ætt velt eldri ættum úr sessi. Hefur þessum tíma verið skipt í þrjú megintímabil eftir því hverjir fóru með völdin.
Upphaf þessa mikla ríkis er rakið aftur til um 3100 fyrir Krist þegar fyrsti faraóinn, sem kallaður var Menes, sameinaði landið, þ.e. efra og neðra Egyptaland, í eitt svæði, eitt ríki.
Á þessum tíma byggðu Egyptar mikil mannvirki sem sum hver standa enn í dag eins og píramídarnir sem taldir eru hafa verið byggðir í kringum 2500 fyrir Krist.
Þá höfðu þeir sín eigin trúarbrögð og trúðu á marga guði en æðsti guð þeirra var sólarguðinn Amun-Ra. Trúðu þeir á líf eftir dauðann.
Egyptar fundu upp sitt eigið letur sem kallað var híeróglýfur og byggðist það einkum á myndum.
Helstu höfuðborgir Egypta á þessum tíma voru borgirnar Memfis og Þeba. Fyrst Memfis og síðan Þeba.
Egypska ríkið stóð eins og áður sagði nánast óslitið fram að því þegar Persar tóku Egyptaland yfir árið 525 fyrir Krist og síðan sigraði Alexander mikli landið árið 332 fyrir Krist.