Guðrún bað spekinginn Gest frænda sinn að ráða þessa fjóra drauma. Gestur réð þá þannig að Guðrún mundi eignast fjóra eiginmenn. Fyrsta manninn mundi hún ekki elska og hún mundi fara frá honum, „kasta“ honum frá sér. Næsta eiginmanninn mundi hún elska mikið en hann myndi drukkna eftir stutt hjónaband. Gullhringurinn í þriðja draumnum sagði Gestur að væri til marks um að þriðji maðurinn hennar mundi taka „háleitari“ trú, þ.e. kristna trú í stað heiðinnar trúar. Gullið tengdist því ekki manninum sjálfum eða verðleikum hans. En blóðið sem streymdi úr hringnum boðaði að maðurinn mundi falla fyrir vopnum. Fjórða drauminn, þar sem Guðrún bar gyllta hjálminn, réð Gestur þannig að hún mundi giftast miklum höfðingja „og mun hann bera ægishjálm yfir þér“. En þessi maður mundi drukkna í Hvammsfirði.

Guðrún þagði þangað til Gestur hafði lokið máli sínu en varð dreyrrauð í andliti meðan hún hlustaði á orð hans. Þá sagði hún að Gestur hefði eflaust spáð betur ef draumar hennar hefðu gefið tilefni til þess.

Nú reið Gestur brott og þegar hann nálgaðist Hjarðarholt hitti hann Ólaf páa sem bauð honum heim til sín því að hann vildi sjá hinn fallega skála sem Ólafur hafði reist. Ólafur fylgdi síðan Gesti úr hlaði og reið með honum að Laxá. Þar voru margir ungir sveinar að leik, þar á meðal þeir Kjartan og Bolli. Gestur vissi hverjir þeir voru þótt hann hefði aldrei séð þá fyrr. Gestur tárfelli eftir að hann hafði kvatt vin sinn Ólaf páa. Aðspurður sagði hann að hann táraðist vegna þess að hann grunaði að vinátta þeirra Kjartans og Bolla mundi snúast upp í fjandskap og enda með skelfingu.

dreyrrauð: rauð sem blóð (dreyri: blóð) ægishjálumr: hjálmur sem vekur ótta; bera ægishjálm yfir einhvern: vera einhverjum langtum fremri