Eini ömmustrákur Auðar djúpúðgu hét Ólafur feilan. Auður hélt mikið upp á hann og vildi láta hann taka við búinu í Hvammi eftir hennar dag og fá sér góða konu. Ólafur tók þessu öllu vel, og konan sem hann eignaðist hét Álfdís. Boðað var til fjölmennrar veislu, og meðal annarra gesta komu þangað báðir bræður Auðar og einnig systir hennar úr Eyjafirði. Hún hét Þórunn hyrna og var gift hinum fræga landnámsmanni Helga magra í Kristnesi.

Auður svaf óvenju lengi um morguninn en var þó á fótum þegar gestirnir komu. Hún var há og þrekleg og tók vel á móti gestum sínum og veitti þeim vel. Hún lýsti því yfir að Ólafur sonarsonur hennar ætti að taka við landnámsjörðinni í Hvammi. Eftir það bað hún menn að skemmta sér eins og þeim líkaði en sjálf sagðist hún ætla að ganga til skemmu sinnar. Hún gekk hart út úr skálanum, og töluðu menn um hvað hún væri virðuleg. En daginn eftir fannst hún látin þar sem hún sat í svefnstofu sinni. Nú var því ekki aðeins um brúðkaupsveislu að ræða, heldur líka erfidrykkju Auðar. Síðasta dag boðsins var Auður flutt til haugs og lögð í skip sem komið hafði verið fyrir í haugnum ásamt miklu fé. Eftir það var mold kastað yfir og haugnum lokað.