Fyrsta smásagnasafnið um föður Brown leit dagsins ljós árið 1911. Reyndar hafði Chesterton birt eina sögu ,,The Blue Cross” í tímaritinu ,,The Storyteller” árinu áður, en í þessari fyrstu bók ,,The Innocence of Father Brown”,voru ellefu sögur. Aðalpersónan í sögunum, kaþólski presturinn Brown, sem við fyrstu sýn verkar á mann sem klaufskur og óáhugaverður auli og eins ólíklegur og hugsast getur til að vera hetja í sakamálasögu, varð strax eftirlæti lesenda út um allan heim, svo að Chesterton sá sig knúinn til að búa til fleiri sögur um hann.